按我返回上一章 Link to heading
返回主目錄 Link to heading
（本文最後更新時間：2024年8月11日）
IKEA LackRack - 廉價DIY機櫃
點解要自組？自組有咩好/壞處？ Link to heading
優點：
- 💰 硬件性價比可以大幅拋離任意大牌子機種（講緊係同性能下可以平40%或以上）
- 硬件選擇自由（例如可以用舊機既料砌，或可根據自己需求購買各類零件；M.2 10G網卡聽過未）
- 可以學野（Sysadmin及Networking功夫，市場對呢啲技術有需求）
缺點：
- 通常體積較大，耗電量較多
- 安裝麻煩，要花時間讀文檔，必須識英文
- 維護靠自己（不過通常係安裝完後就唔洗點理）
伺服器硬件邊到黎？ Link to heading
舊電腦/Laptop、各式迷你電腦（如J4125/N100機）、Raspberry Pi或其他單板機（SBC）、各式二手伺服器硬件/洋垃圾等。
部分硬件只可能搵到淘寶或國產貨（或外國只有高價代替品），如各式軟路由工控機及細NAS機箱等。
NAS機箱有外國貨（如Fractal Design既Node系列），不過通常偏大部/貴，想要細部或平啲就要淘寶。
延伸閱讀：Small Form Factor PC Master List
用咩硬件去增加主機板SATA插口數？ Link to heading
請睇以下文章：
Recommended Controller for Unraid
Top Picks for TrueNAS and FreeNAS HBAs (Host Bus Adapters)
用HBA卡既話要自己刷韌體改做IT模式，詳情請自己Google。
買硬件有咩要注意？ Link to heading
預計伺服器負載買CPU Link to heading
大部分人既伺服器絕大部分時間都係待機，咁樣既話你買CPU唔應該睇滿載耗電量，而要睇待機耗電量。
就我所知：Intel及AMD G系列CPU既待機耗電較低，而AMD非G系列就待機耗電較高。
但如果係常時都高負載既話，AMD非G系列CPU通常較同價既Intel CPU有更佳能耗比，值得考慮。
另外：Intel T字尾CPU待機時耗電同普通版差唔多。普通版CPU係BIOS設定功耗牆之後可以做到類似T字尾CPU既效果。
延伸閱讀：Intel T processors power consumption tests
延伸閱讀：Balancing Power Consumption and Cost: The True Price of Efficiency
ECC RAM Link to heading
ECC既用途係偵測RAM有否發生Bit flip，如有就嘗試修正。（運作原理）
如果冇ECC，咁你RAM發生Bit flip時可能咩事都冇，可能令伺服器死機，最嚴重既情況係造成偵測唔到既資料損毀。
但Bit flip發生機率極低。除非玩到Data center級數，或者伺服器放係高輻射地區，否則可能廿年都遇唔到一次因Bit flip造成既資料損毀。
雖然ECC RAM本身唔係貴好多，但可以用ECC RAM既主機板/CPU可以貴勁多。尤其是Intel，家用級主機板晶片組（Chipset）全部唔支持ECC，要上到工作站或伺服器級主機板先有，呢啲主機板一手價超級高。
AMD反而係家用級已經有，所以想要ECC可以先睇AMD（例如5650G配X570板，低能耗+多核+有內顯+支持ECC+靚IOMMU）。另一個選擇係執二手伺服器硬件/洋垃圾（Xeon/Epyc之類），淘寶一堆平價野。
我既諗法係，你要儲存既數據愈多/愈重要，用既RAM量愈大，就愈值得買ECC件。（當買個心安都好）
延伸閱讀：Will ZFS and non-ECC RAM kill your data？
- ECC RAM有分RDIMM/LRDIMM/UDIMM，要睇清楚塊板支持邊款先好買。
- DDR5所謂既內置ECC並非真ECC，且不能取代真ECC。
- ECC唔係靈丹妙藥，如果條RAM本身係壞既話照樣會狂出Error。
主機板IOMMU組分佈 Link to heading
如果你想行虛擬機的話，有機會要將硬件Passthrough入虛擬機，例如將CPU內顯送入Jellyfin虛擬機或將SATA控制器送入NAS虛擬機。如此送入去既硬件完全由虛擬機控制，可獲得接近無損性能。
要做PCIe passthrough既話，主機板要支持IOMMU，此外亦要注意IOMMU組分佈。
每個硬件都屬於一個IOMMU組，但一個IOMMU組可以有多過一個硬件。PCIe passthrough係以一個IOMMU組為最小單位，想送某個硬件就要連同佢IOMMU組既其他硬件一齊送入去。
假設你主機板PCIe 1槽、SATA控制器及網卡係同一IOMMU組，咁你想送個插咗係PCIe 1槽既硬件（如顯示卡）入虛擬機，就要將SATA控制器（連帶硬碟）同網卡都送埋入去。
宿主機及其他虛擬機不能使用Passthrough咗入一部虛擬機既IOMMU組既全部硬件。
要自己做功課，搵下咩主機板IOMMU組靚。唔一定要追求最完美（即每一個硬件都獨佔一個IOMMU組），可根據你既需求去查（例如想整NAS虛擬機既話，隻SATA控制器最好獨佔一個IOMMU組）。
值得一提既係，有方法強行令全部硬件都有自己一個獨佔既IOMMU組（關鍵字：ACS override patch）。Proxmox跟呢個教學就可以用到呢個Patch。注意用呢個Patch有安全性風險（可以自己Google下）。
主機板晶片組同CPU之間係用一條PCIe link連接住（Intel稱之為DMI），晶片組上所有硬件會共用DMI既頻寬（Bandwidth）同CPU做資料傳輸。
唔同晶片組既DMI頻寬可能唔同，例如Intel 5xx/6xx系、AMD 6xx系晶片組既頻寬係PCIe 4.0 x8（約16GB/s），AMD 5xx系就只得PCIe 4.0 x4（約8GB/s）。
係晶片組做大量資料傳輸（例如同時存取晶片組上多隻NVMe SSD）既最快速度受DMI頻寬限制。
宿主機及虛擬機共享Intel CPU內顯 Link to heading
Intel CPU既內顯可以用SR-IOV（12代或以後）或GVT-G（5至10代CPU）方法令宿主機同虛擬機都用到佢。
唯獨係11代咩都冇。如果你個宿主機同虛擬機都要用內顯（例如個宿主機靠內顯先顯示到野，但虛擬機行Jellyfin要內顯做轉碼）既話要注意。
如果不幸地用緊11代Intel CPU，或唔想搞以上既野，可以轉用LXC或Docker：只要個宿主機用到個內顯，LXC及Docker就肯定有方法用到。
延伸閱讀：Intel GVT-G setup（Arch Wiki）
有方法使宿主機同虛擬機共享某啲型號既NVIDIA顯示卡。
呢到有適用於Proxmox既安裝教學。注意30系及以上既顯示卡型號用唔到呢個方法。
LXC係咩黎？同Docker/虛擬機有咩唔同？ Link to heading
LXC全名係Linux Container。雖然佢同Docker一樣都係"Container"科技，但佢概念上同使用上都更接近虛擬機，係虛擬機既輕量級代替品。
同虛擬機相似，係LXC上面你係手動裝軟件行。另外兩者都支持快照（Snapshot）及備份。
LXC（及Docker）同虛擬機唔同既係佢會同個宿主機共用內核（Kernel），所以資源消耗較低。（虛擬機有自己內核）
另一個優勢係，因為LXC（及Docker）只係宿主機上既一個進程（Process），所以可以同個宿主機（及其他Container）共用硬件。虛擬機就只能透過SR-IOV共用硬件，或用Passthrough並失去硬件使用權。
相對地LXC（及Docker）安全性較弱，例如佢地造成Kernel panic時會炸死埋個宿主機及其他虛擬機，虛擬機Kernel panic只會炸死自己。
此外，因為共用內核，宿主機因內核太舊而行唔到既軟件，LXC（及Docker）同樣都行唔到。（例如Wireguard要內核版本5.6或以上）
Docker同LXC唔同既係Docker一個Image淨係會行一隻軟件，但LXC你可以係上面裝十幾廿個軟件同時行。
Docker係軟件級Container：一個Image專行一個軟件 ；LXC係OS級Container：同虛擬機一樣，佢提供咗個OS比你做平台，你係上面玩咩都得。
用咩OS？ Link to heading
Hypervisor OSProxmox VE 👍、VMWare ESXi（付費）、Windows Server + Hyper-V（付費）、XCP-NG
NAS OSTrueNAS（建議選Scale）、Xpenology（黑群輝）、Unraid（付費）、OpenMediaVault
伺服器OSDebian 👍、Ubuntu Server、CentOS Stream、RHEL（16個免費）、Windows Server（付費）
路由器/防火牆OSOpenWrt 👍（家用路由器推薦）、pfSense/OPNSense
一部裝咗OpenWrt既家用路由器可以做曬防火牆、路由器、VLAN交換機同無線存取點既工作。
而且唔洗買好貴既機，例如GL.iNet MT6000非常適合OpenWrt，現時淘寶都係700蚊人仔左右。
Linux底既OpenWrt支持好多軟件，例如LXC/Docker、Wireguard、AdGuardHome、NGINX、SQM等等。你甚至可以用幾部OpenWrt機行802.11s Mesh Networking同802.11k/v/r 快速漫遊。
如果你岩岩開始玩Homelab，可以先從支持OpenWrt既家用路由器入手，有需要時再買獨立Networking硬件。
Proxmox VE介面
咩係Hypervisor？點解要用佢？ Link to heading
Hypervisor即專用黎行虛擬機既軟件。上一項提及既Hypervisor OS用既全部都係用Type 1 hypervisor（例如Proxmox用既係KVM+QEMU），虛擬機可繞過宿主OS直接使用伺服器硬件，藉此獲得接近無損性能。
用Hypervisor既好處：
- 虛擬機快照及備份（非常實用）
- 可以匯入虛擬機，或匯出虛擬機去另一部Hypervisor
- 容許將來擴展規模，例如伺服器硬件升級後可以開多幾隻虛擬機
- 視乎你既硬件，重啟虛擬機可能比重啟實機快勁多
就算你只會用一個虛擬機，都可以考慮下用Hypervisor：淨係快照及備份通常都值回票價。
KVM+QEMU任何Linux機都用到。有一個特別玩法係Desktop Linux上面整個Windows虛擬機打機。
我自己部PC就係用Fedora Linux做主OS，並用Windows 10虛擬機打機。詳情可以睇我呢個Post。
咩係IPMI？有冇代替品？ Link to heading
IPMI係遠端管理伺服器既工具。同普通Remote desktop工具唔同既係佢可以係最底層控制個伺服器。
不但可以遠端睇到伺服器既螢幕輸出同埋操控佢，仲可以開/關機、改BIOS設定、重裝OS等等。非常適合伺服器放屋企外或難搬地方既人。
Intel有個類似工具叫VPro，好多商用Intel機都有支持，配合MeshCentral可做到中央控制。
另一個相對易入手既代替品係PiKVM，需要你自己買件DIY，或者買作者成套件砌。想平啲既話可以去淘寶搵山寨版（Blicube/Geekworm）。
PiKVM甚至可以配合特定KVM switch一下控制多部機。
CPU冇內顯，買咩顯示卡做轉碼？ Link to heading
Intel既獨立顯示卡👍 入門級型號（1000蚊樓下買到）就已經有同高階卡一樣既超強轉碼性能。
支持好多媒體格式（包括AV1 encoding），低能耗，有啲型號甚至係半高/單插槽闊，非常適合伺服器用。
此外NVIDIA Quadro系列都唔錯，可以搵下有冇二手貨。
想買轉碼卡既話建議睇下呢啲參考資料再買：
Media Capabilities Supported by Intel Hardware
NVIDIA Video Encode and Decode GPU Support Matrix
Plex Media Server Hardware Transcoding Cheat Sheet
延伸閱讀：nvidia-patch（移除NVIDIA顯示卡既同時間轉碼數上限）
更多討論區/資源 Link to heading
ServeTheHome（Homelab新聞/硬件評測網頁）
鳴謝 Link to heading
多謝你睇到最後！
特別鳴謝連登Homelab post既一眾巴打，大家既討論令我學到好多野。
如果你冇睇連登Homelab post，歡迎你入黎一齊吹下水，交流下技術 🤼♂️ 。